Ël camp ëd vol ëd Cossà

Ës regolament a règola l'atività d'aeromodelism dl'Associazione Aeromodellisti Biellesi, ant ël camp ëd vol ch'a l'é an località Pobbia, a Cossà.

Ant ël camp ëd vol a l'é përmëttù fé atività d'aeromodelism stàtica e dinàmica con session d'alenament, ancontr e radun, aveniment sportiv dilettantìstich. L'atività as ispira ai prinsipi fondamentaj dl'ordinament sportiv e olìmpich e ai valor dla coltura aeronàutica internassional.

Minca aeromodelista a conforma soa condòta al prinsipi dla responsabilità individual, dla solidarietà con la comunità sportiva, dla protession pì granda dla sicurëssa soa, ëd j'àutri e dl'ambient d'antorn, dla colaborassion leal con j'istitussion pùbliche e j'organism sportiv, dël rispet dla normativa europea e nassional ch'as àplica.

L'intrada a j'impiant e ai servissi dël camp ëd vol a l'é riservà ai sòci an régola con ël pagament dle quòte sociaj. L'intrada al camp a l'é assolutament proibìa a chi ch'a l'é nen sòci, gavà ch'a-j daga ël përmess ël responsàbil dj'operassion o na përson-a ch'a l'ha sërnù chiel.

L'atività d'aeromodelism dinàmica a l'é riservà ai sòci ch'a l'han na polissa d'assicurassion ancora bon-a, ch'a l'han ël patentin EASA UAS A1/A3 e ch'a l'han tacà a sò UAS un QR-Code regolar dàit da la piataforma D-flight, ch'a fa conòsse l'operator UAS a chi ël model a fa cap. J'àutre përson-e ch'a son nì operator UAS nì pilòta da lontan a peulo intré col përmess dël responsàbil dj'operassion o dla përson-a ch'a l'ha delegà chiel.

Quand ch'a intro ant l'impiant, j'òspit a son anvità a lese na còpia d'ës regolament, tacà andoa as vëd bin ant l'impiant, a rispeté lòn ch'a dis ël responsàbil dj'operassion o la përson-a ch'a l'ha delegà chiel e a fërmesse ant j'aree protegiùe, sensa mai intré an pista e/o dé fastidi a j'atività për tèra e an vol. Dal moment ch'a intra ant l'impiant, minca përson-a a perd la qualìfica ëd «përson-a nen coinvòlta ant j'operassion UAS» ai sens ëd l'art. 2, comma 2, n. 18 dël Reg. (UE) 947/2019.

J'animaj ëd ca, s'a-i son, a deuvo sempe esse tnù a la lassa, sensa gnun-a eccession.

Al camp ëd vol a-i é la figura dël responsàbil dj'operassion, ch'a ten d'euj che ës regolament a sia conossù e aplicà. Ël responsàbil dj'operassion a l'é nen responsàbil se quaidun a viola le régole d'ës regolament o la normativa europea e nassional ch'as àplica. Ël prim operator UAS o pilòta da lontan ch'a intra ant l'impiant, quand ël responsàbil dj'operassion a-i é nen, a dventa chiel ël responsàbil, fin-a che a riva un dij nòm dla lista.

L'impiant a l'é dividù, coma da la carta an alegà, an: 1) area d'intrada e parchegi; 2) area separà për j'òspit e ristòr; 3) area montagi UAS; 4) area për anvisché ël motor; 5) pista e area ëd decòl e aterage për UAS a ala fissa e a ala rotanta; 6) area ëd pilotage.

Tute j'operassion prima, durant e dòp ël vol a deuvo fesse con la sicurëssa pì granda për sé midem e për j'àutri.

Ant j'aree da 4 a 6 a intro mach l'operator UAS, ël pilòta da lontan e, se a-i é damanca, n'assistent o pì assistent për esigense particolar, e ël responsàbil dj'operassion o la përson-a ch'a l'ha sërnù chiel.

Ël responsàbil dj'operassion, prima dël vol, as assicura dle condission psico-fìsiche dël pilòta, dle condission meteorològiche e dël tràfich aereo.

Ël pilòta da lontan, prima d'anvisché ël radiocomand, a contròla che soa frequensa a sia nen dovrà da d'àutri aeromodelista ch'a-i son, gavà s'as deuvro radiocomand a 2,4 GHz.

Ël pilòta da lontan a fa un contròl prima ëd minca lanc e dòp l'aterage, ten-end d'euj sopratut che j'ale e le superfice ëd comand, ij motor e j'élica a sio bin fissà, e che ij dispositiv ëd comand con ij fil o via radio a marcio bin, comprèis che tute le part mòbij as bogio coma ij comand dla trasmitent, e ëdcò la càrica dle batarìe e ël livel dël carburant ant ël model, s'a-i n'é. S'a-i é dubi su com a marcia l'aparat UAS, a l'é proibì portelo an vol. As deuvo dovré batarìe an bon stat e con un livel ëd funsionament ch'a garantissa an sicurëssa tute le fase dël vol. Ël radiocomand a deuv avèj n'alarm për la tension bassa.

J'aeromodej a deuvo esse costruì con n'eficiensa e n'afidabilità tal da dé garansìe ëd sicurëssa an condission normaj. Për ij vol ëd colàud a l'é obligatòri avisé tuti coj ch'a-i son, përchè j'operassion as fasso con la sicurëssa pì granda.

As peulo anvisché ij motor mach ant j'aree 4 e 5. A l'é assolutament proibì buté an mòto qualsëssìa motor con dle përson-e davzin. Për buté an mòto j'avion con motor a scòpi a l'é mej dovré ij motorin d'anviament apòsta pitòst che viré l'élica a man. A l'é proibì anvisché ij motor quand d'àutri a son an vol, gavà ch'a sio d'acòrd.

Ël decòl as fa mach dòp avèj controlà che la pista a sia dël tut lìbera da përson-e o ostàcoj. A l'é assolutament proibì surtì da la pista, dòp l'aterage, con ij motor an mòto o con j'élica ch'a viro.

A l'é proibì survolé j'aree da 1 a 3 e, ëdcò se ël regolament ENAC a lo përmëttrìa, la cassin-a ch'a l'é a sud-est dla pista. Se për sbaglio as seurt da l'area ëd vol, ël pilòta da lontan a atèra e a fa na verìfica con ël responsàbil dj'operassion o con la përson-a ch'a l'ha delegà chiel. L'area andoa as deuvra l'UAS a deuv mai e peui passé ij lìmit autorisà o, andoa a-i é, coj butà ant la Litra d'Operassion firmà con j'Autorità militar o civij e scrivù ant j'at d'autorisassion ENAC ëd qualsëssìa forma giurìdica.

Decòl e aterage, con procedura normal o d'emergensa, a deuvo sempe esse dichiarà a vos àuta dal pilòta e arpetù da l'assistent, s'a-i é. Prima d'aterè, a contròla che la pista a sia lìbera.

A l'é proibì andé an vol con un temp brut, tal da compromëtte la capacità ëd governé ij modej.

An general, as peul avèj an aria mach un aeromodel a la vira. Ël lanc d'un scond aeromodel a l'é autorisà da chi ch'a l'é già an vol, gavà che ël responsàbil dj'operassion o la përson-a ch'a l'ha delegà chiel a sia nen d'acòrd.

Ij vol mùltipj as peulo fé, basta ch'a vado d'acòrd con la sicurëssa dij pilòta e ëd tuti coj ch'a-i son.

Chissëssìa ch'a sia ant l'impiant e a vëdda un tràfich an aria ch'a peul dé fastidi a j'atività ëd vol, a avisa ël responsàbil dj'operassion o la përson-a ch'a l'ha delegà chiel. An cas ëd conflit, ël pilòta da lontan a pòrta l'UAS a n'autëssa tal da evité minca arzigh për j'aeromòbij ordinari e, se a peul, a lo pòrta torna a tèra. Tute j'atività ëd vol a deuvo esse sospèise fin-a che l'arzigh a-i é pì nen.

An vol as evita minca sòrt d'esibission ch'a buta an arzigh përson-e e còse an tute j'aree dël camp, comprèise cole për ël vol.

Ij sòci ch'a veulo dventé aeromodelista a deuvo për fòrsa esse compagnà da un sòci espert ch'a-j fa da tutor, fin-a che, a giudissi dël responsàbil dj'operassion o dla përson-a ch'a l'ha delegà chiel, a saran rivà a un livel giust d'autonomìa e sicurëssa.

Fin-a a col moment, l'aspirant aeromodelista a fa le session ëd vol con ël sistema ëd dobi comand ciamà «alliev-magìster».

L'aspirant aeromodelista a dis al responsàbil dj'operassion o a la përson-a ch'a l'ha delegà chiel d'avèj fàit bastansa session al simulator sël PC, për amprende le manòvre ëd base e pijé confidensa con ël radiocomand.

Ël consej diretiv dl'Associassion as riserva ëd modifiché ës regolament s'a lo ten necessari.

Ël President, Andrea Migliorini